演出地點︰上環文娛中心8樓黑盒劇場
第0場 紐約家中
（勞倫斯和勞二回到家）
勞二︰你唔睇吓邊個搵你？
勞︰聽唔聽都係咁架啦。
勞二︰可能真係佢呢。
勞︰如果唔係呢？
勞二︰得個知字丫嘛。
勞︰…我唔在乎。
勞二︰你唔在乎就唔會一入屋就望住電話盞燈啦！
勞︰係盞燈閃，我先望。
勞二︰有分別咩？
勞︰你知咩！
勞二︰……或者有彎轉//。
勞︰唔會！
勞二︰你做咩咁肯定啫！佢仲鍾意你！你都好愛佢，咁佢//
勞︰（用犀牛角裝飾品刺死勞二）噫！
勞二︰（奄奄一息）卡蘿佢不會再回來了……
勞︰你收聲！
勞二︰你仲以為同以前一樣，嘿…哈哈！
勞︰你收聲呀！
勞二︰啲電話錄音又係你自己錄架？你聽吓自己把靚聲丫嘛，哈哈哈！
勞︰你收聲…我叫你收聲呀！
勞二︰有啲嘢…唔係你想唔記得，就可以唔記得……
勞︰（再抽出犀角，狂刺勞二，直至勞二沒有反應）
（勞倫斯自己腹部流出大量鮮血，死去）
（LX: B/O；SD:音樂）
第1場 診療室
（燈亮。台中是一張猩紅長沙發。勞倫斯躺在沙發上。薛芙醫生在泡咖啡）
勞︰你有無試過啲咁既經歷呀？
薛︰你講啦，我聽到架喇！
勞︰有一日我無聊攞本書來睇，睇睇下咁有人敲門，咁我就搵張紙巾夾住當書籤，放番低本書去開門啦。第二朝想繼續睇本書，打番開紙巾夾住嗰頁…竟然唔同咗喎，我之前明明夾住第30頁，但係嗰日打番開係60頁。呀，你話我係咪嗰種PARAPRAXIS丫嗱？
薛︰（遞上咖啡，坐下）嘻，你喺邊度學哩個字架？
勞︰維基百科囉！
薛︰呵呵……就係哩件事？
勞︰唔止！有次收到我研究室既電話費單，上面差唔多全部都係我打返紐約屋企既紀錄啦，奇就奇在呢，仲有一個號碼我一啲印象都無，我喺度諗我搵邊個呢？跟住望一望個時間，係凌晨兩點！我嗰個鐘數點會係研究室啫？
薛︰會唔會係其他人呀？
勞︰我就係咁諗！但係會係邊個呢？無人同我SHARE間房架喎……
薛︰話我知，你懷疑係邊個？
勞︰芭芭拉。
薛︰嗯…
勞︰106室既上手，叫芭芭拉‧海勒曼。
薛︰你覺得係佢。
勞︰……嗯…唔會！佢死咗架喇！
薛︰你又面紅喇。
勞︰我知！唔好意思！
薛︰喺我面前，面紅都好正常既！
勞︰你咪傻啦！我同你講過架喎！
薛︰哈哈哈！講下笑都得啩。
勞︰哈哈！得得得！……係啦，最近成日都係咁，好熱呀！好煩呀，時不時就咁，又控制唔到喎，一諗錯某啲方向呢就來料嘞，仲要成身紅晒！不如我留鬚遮住咁會唔會好啲呢？
薛︰咁要留到拉登咁先遮得晒喎！
勞︰唉！呀係呀薛芙醫生，頭先來之前，我喺下面公園見到你喎。
薛︰有啲咁既事？
勞︰嘻，你條皮裙幾靚丫……嗱，係你叫我有咩意識到既想法都話你聽架︰我覺得你有時都幾索。
薛︰哈哈！有時咋咩？
勞︰跟住我忽然就諗，你呢喺見病人前後既空檔呢，就會着起條皮短裙，落去公園撩啲阿叔…咩…嘻，PART-TIME，嘿嘿，我講笑…
薛︰嗯…
勞︰咁係你叫我有咩都要講既。
薛︰話畀我知，你有無對我，曾經，即使係好短既時間，有過涉及性慾既情感？
勞︰無！喂你問過我幾次喇喎，你係咪好想我答有啫？咁你不樓係屬於扒類，豬扒科，五花腩目架嘛，我點會//
薛︰嘿。
勞︰喂呀，咪嬲啦，我覺得你頭先好索係真架！
薛︰放心喎。你哩啲宅男又點會識欣賞我呢啲正嘢丫？我本來唔打算講，但係喺衡量之下都係認為話你知比較好。
勞︰嗱，我老婆雖然唔喺度吓…你係我心目中仍然係屬於扒類、豬扒科//
薛︰我今日成日都無離開過哩間房。（SD︰音樂F/I）
勞︰……
薛︰你入來之前我睇緊另一個病人，你應該都見到佢走架？
勞︰嗰個男人。
薛︰之唔係嗰個男人。定係你見我做緊其他「男人」，你好不安？嘻。
勞︰……痴線！……
薛︰哈，嗱面紅喇你！
勞︰……費事同你講呀！走喇！
薛︰嘻！唔坐多陣？吓？
勞︰噓！趕住開會呀，第日再同你玩過！
勞二︰認錯人呀？
勞︰關你咩事！
勞二︰你認錯人呀，唔係唔記得嘢咁簡單呀！
勞︰邊個未認錯過人啫…
勞二︰依家係兜口兜面咁認錯……你諗緊乜呀！
勞︰……（下）
第2場 研究室
（性騷擾防制委員會一眾委員在勞倫斯的研究室開會。研究室內陳設︰桌子，上面有電腦、帶輪椅子數張、背後有書架。一眾委員圍枱開會）
勞︰來丫，入來丫！
主席（羅傑‧弗里曼）︰Laurence，今日專登同你House warming，正式歡迎你加入我地性騷擾防制委員會！
勞︰乜說話呀，我多謝你地就真，肯來我間房傾，而且，每個Teaching Staff都有義務加入一啲行政組織架嘛。
勞二︰咁你可以參加第二啲架啫，吃力唔討好！
勞︰來丫，我擺好凳架喇，隨便坐。
主席︰你之前係路易斯安那教嗰時係紀律委員會既委員，有哩種經驗既Staff比較少，好多謝你肯加入，成為我哋既生力軍。
勞二︰呢種委員會專抽稱人…
勞︰我想請問性防委，係咪會經常對人提出指控架呢？
勞二︰乞人憎！
主席︰主要係對內部同事，甚至學生進行調查，如果有事，唔排除要聆訊、搜證、起訴咁。
勞︰哦，嗯，我諗我明白。
勞二︰到頭來啲被控訴既人咪抽稱番你！指住你來鬧、喺你辦公室外面示威叫囂……
勞︰SHUUU！
主席︰不過你可以放心，係亞瑟克雷學院好少發生哩啲事。同埋，we work as a team! 唔使擔心喎—
勞︰咁我做既係性別研究，又成日教學生以科學方法分析「偏見」呀、「虛偽行為」呀，甚或嗰啲「賤男」「惡女」既現象咁，為學院出吓力都應該既。
勞二︰你有資格咩？笑死人！（下）
主席︰咁就好喇！咁我地開會喇。
眾︰（應）
主席︰今日我哋有學生會既代表來旁聽，我哋不如討論咗佢哋既議程先，等佢哋可以走先，好嘛？咁你哋可以開始。
學生︰係。多謝各位委員再次畀我哋參與會議。今次我係專程來聆聽各位委員就住上次會議提呈既活動計畫書既議決，唔知大家有結果未呢？
主席︰係關於「性騷擾覺醒週」、「男女同宿辯論」、「我要出夜街活動」、同埋「性感無罪講座」幾個活動，我哋現在表決，贊成學生會幾個活動既方案既請舉手。
眾︰（舉手，勞稍遲舉手）
主席︰好，咁請你哋開始籌備啦！
學生︰嗯，多謝各位委員，再見。
眾︰再見。
主席︰不如我哋傾吓嗰敏感話題丫？
眾︰好丫。
勞︰……
伊蓮︰弗里曼先生係講緊一個叫布魯諾‧傑克遜的英國講師，傳言佢同好幾個學生發生性關係。暫時都無人正式申訴。
主席︰不過謠言就滿天飛，我哋上次就開始傾緊對策。
勞︰布魯諾，我識佢喎，佢同我一齊Orientation既。
伊蓮︰你都記得。
勞︰記得！嗰時係你同我哋講性騷擾講座架嘛。
伊蓮︰你嗰時覺唔覺得佢好怪？
勞︰怪呀？……我淨係好記得佢想係文學課上面講Jane Austen既《曼斯菲爾德莊園》入面既性意象，而你就不以為然。
伊蓮︰我只係話佢需要敏感啲，我邊有權教佢教書啫！
勞︰佢好唔忿氣喎。
伊蓮︰我就唔明點解佢係都要講人自慰，好好讀一本小說唔得既！
主席︰我諗我哋要同呢個後生仔講吓，畀個機會佢解釋吓。免得遲啲又整多個楚米齊克出來。
勞︰楚米齊克係邊個？
會眾甲︰哼，哩條友…
伊蓮︰佢係哩度做過客座教授，佢好似係咩詩人定小說家來架，來自羅馬尼亞定保加利亞嗰類地方。
會眾乙︰嗰條友衰到痺。
勞︰佢做咗啲咩呀？
會眾甲︰佢咩未做過丫，幾乎個個女生都被佢撩混晒。
伊蓮︰後來終於有人向校長申訴。
會眾乙︰佢一啲都唔覺得羞恥，係學校入面發晒癲，大吵大鬧，連校長都鬧埋。
會眾甲︰嗰次真係好誇張，佢見人就鬧，爆晒粗。
主席︰嗰日真係好混亂，佢好似癲狗咁周圍吠，啲學生又鬧番佢，亂七八糟。
伊蓮︰最後佢衝咗落街，再無出現過。
勞︰…都幾傳奇吓。
會眾甲︰醜事傳千里。
主席︰哩啲事，我哋性防委受咗唔少壓力，校長詐晒型。
勞︰所以你地就好緊張布魯諾件事喇。
主席︰嗯，我哋再受唔起第二次。好喇，喂，我趕住去打golf，不如下次繼續。
眾︰（應）
（暗燈。眾下。勞二上）
勞︰你，記唔記得個兜入面有個保加利亞coin呀？
勞二︰你又唔記得嘢？
勞︰我唔會記錯，保加利亞咁怪。嗰時個兜入面仲有個鎖匙扣啦、一粒石仔、松果，同埋個保加利亞coin，一面係個人像，另一面係抽提子……會唔會有咁仔細既幻覺呀？
勞二︰你懷疑係嗰個楚米齊克。
勞︰我之前完全唔認識佢，更加唔知佢係保加利亞人。
勞二︰你諗多咗。
勞︰卡蘿既失踪同佢有關。
勞二︰憑咩呀？
勞︰我會再調查。
勞二︰你想點？
（勞想回答，勞二消失）
勞︰（陷入沉思，踱步，忽然發桌下有一異物，抽出來，是根棍子。非常審慎，左右觀察。再發現桌下有一張被子，髒髒的，餿餿的。最後發現桌下是一「藏身」空間。（SD︰音樂起）。自己躲進去，既興奮，又驚訝，又恐懼。瑟縮在裏面唸唸有詞）楚米齊克…楚 米 齊 克。
（躺下來蓋上那被子蜷曲）楚米齊克，係你！我一定摷你出來，楚米齊克！（SD C/O；Lx B/O）
第3場 診療室
（燈亮。台中是一張猩紅長沙發。勞倫斯坐在沙發上，喝一口咖啡，準備躺下；薛芙醫生遞上一張支票）
勞︰做咩呀？唔啱數咩？
薛︰你睇清楚！
勞︰啱呀，唔係加價吓嘛？
薛︰我叫做薛芙，唔係薛若德呀！
勞︰嘻！係喎，對唔住！對唔住！我返去改過張俾你，下次俾番你吓。
薛︰得喇！來，瞓低！
勞︰嗄，之但係薛若德係邊個呢？薛若德，薛若德…
薛︰嘿，你咁多風流債，無謂諗啦！
勞︰喂！嘢可以亂食喎！/
薛︰/（按下勞）點呀，有無搵過老婆？
勞︰琴日先諗過搵佢食飯。
薛︰嗯？
勞︰諗啫！我見到火車月台上面有個公用電話，就開始諗打畀佢，我想像我好自然咁同佢打招呼，問佢過得好唔好，建議同佢食飯。跟住我又明白佢唔會想食飯，然後我就友善咁同佢講拜拜。最後我都係決定唔打，因為，萬一佢應承我，咁我就唔可以心安理得咁，幻想佢坐喺我對面食飯……
薛︰唔好咁啦！
勞︰放心喎，我明架喎……有時亂諗吓，俾自己喘息下…開心吓。
薛︰嗯，有沒有聽過「順勢療法」？
勞︰順勢療法，我聽我老婆講過喎。
薛︰係喎！你老婆係哩方面的專家。
勞︰專咩家丫，毒藥同解毒劑先係佢既本行。話你知丫，佢係來搵我爸爸既手稿睇，我哋先有機會識既。
薛︰噫真係估唔到喎！
勞︰佢成日話啲越毒既嘢就越有解毒能力。
薛︰係喇！而醫學界一直相信，有角動物嗰對角係最毒，又係最有效既解毒劑，嗰啲羚羊角呀、犀牛角全部都有治療毒傷既能力。古時嗰啲人呢，好鍾意將啲鹿角、羊角呀挖空整成酒杯或者護身符。
勞︰係唔係佢哋無文化，迷信丫喇？
薛︰如果你相信哩啲嘢無毒而又有療效呢，咁就叫做「對抗療法」；相反，如果你認為佢哋本身有毒，以毒攻毒呢，就叫「順勢療法」。
勞︰（感興趣，坐起來沉思）
薛︰因為佢哋全身既精華，都集中喺對角度，所以好多人都對哩啲動物角趨之若騖，非法巿場賣得好貴架！
勞︰唔怪得咁多人去捉啲鹿呀、犀牛咁啦！嗄，你話最貴係咩動物丫嗱？
薛︰仲使講既！啲角值錢係因為佢哋集中晒啲精華係個篤篤度，你諗吓，如果得一隻角，佢既精華濃度就會加倍。
勞︰獨角獸！乜真係有架咩？
薛︰咁我又唔知呀，不過順勢療法既學者都認為獨角獸既角有終極毒性既物質。你知唔知呀，公既獨角獸成日會互相打鬥，佢哋對母獸既態度都一樣，打到死為止。
勞︰咁暴力架咩？仲以為佢哋好似電影入面咁禁善良既添。女人都照打！
薛︰佢哋都唔想架，佢哋身體要過濾角入面既毒素，造成劇烈既痛楚。所以佢哋經常會發出啲恐怖既咆哮聲…甚至用佢哋對角去挑戰大笨象之類既巨形動物。
勞︰佢哋想減輕一吓痛楚！……喂！薛芙醫生，你唔係想搵毒毒我呀嘛？
薛︰咁順勢療法又唔一定用藥既，而且，我又唔識毒既。
勞︰咁…
薛︰你瞓低先，嗯……講吓你媽媽。
勞︰媽媽……好啦。（沉默）……只有我比較了解媽媽。一個普通人又點會了解，一個守寡的母親為咗將八歲既獨子送去寄宿學校而欠下巨款。其他人又點會了解我哋屋企既張力……我媽媽試過喺我繼父既舊同學面前話「喂，有無人有TISSUE」，我繼父嗰邊所有人食飯都只會用「NAPKIN」…問題係嗰啲場合上面係唔會話︰「喂！有無人有TISSUE」架嘛，哩種事係幾嚴重既失禮？一個有豐富文化素養、好識享受人生既上巿公司董事，擁有出身貴族既妻子、三個小朋友、一座祖傳宅邸……竟然睇中新來既秘書，慢慢，內疚咁將佢自己好似陳年佳釀既人生從一樽高貴、帶有歷史光輝既樽入面倒出來，倒入我媽媽同我哩種，來歷不明…不知所謂既廉價玻璃杯既人生。
薛︰你，好介意。
（舞台另一區域燈亮F/I。一桌，三椅。沙發區DIM1/2。後來父婦二人開始吵罵後，勞二不勝其煩，坐到勞紅沙發的一側去）
勞︰嗰年我十五歲，去咗肯特郡間屋嗰度度假。
媽︰你面色有啲差喎仔。
童勞︰我OK喎。
媽︰你係咪好悶呀？
童勞︰無呀。
媽︰叫咗你叫埋啲朋友仔一齊來架嘛！
童勞︰我都無嘢。
媽︰哩度好多嘢玩架嘛，踩吓單車又得，撐吓船又得…我覺得佢地會好想來。
童勞︰我淨係想溫書咋，就來考試喇。
（沉默）
媽︰最衰貝斯家又好似唔想同我哋交朋友咁啦……
（沉默）
媽︰佢哋好似有個女同勞倫斯差唔多大架係嗎，羅伯？
繼父（羅伯）︰（看報紙，桌上一杯白酒，側身不正對妻子坐着）係啩。
媽︰點解你唔請佢哋過來飲杯cocktail呢？
繼父︰哩件事我哋傾過架喇，老婆。
媽︰嗯，就係因為佢哋未得閒請番我哋食飯，我哋就唔可以請佢哋飲cocktail，我覺得好好笑囉…古板，守舊。
繼父︰我哋請佢哋食飯係一年半前既事，如果人哋真係想同我哋來往既，一早就請番我哋轉頭啦，你咁都睇唔出架咩？
媽︰咁…佢哋做咩唔想同我哋來往丫？
繼父︰唔知喎。
媽︰你係上巿公司董事，勞倫斯係名校學生…我雖然無咩名，但起碼唔係個悶蛋中女丫……唔似得阿Kelly，貝斯小姐咁丫。我覺得佢哋會鍾意同我哋做朋友架喎…或者佢哋怕醜，想我哋再邀請呢，羅伯？
繼父︰都可能係既。
媽︰你根本就唔想幫手！
繼父︰咁你唔可以強迫人哋鍾意你架嘛，老婆。
媽︰如果一個人從來唔會輕輕催逼一吓人既，我真係唔知佢點會得到佢想要既嘢喎！……我哩世人…依家有既所有嘢，有咩唔係逼番來架？
繼父︰你依家明點解人哋覺得你煩啦！
媽︰佢哋覺得我煩？
繼父︰唔係呀老婆，即係咁講呀。
媽︰就係因為咁所以佢哋/
繼父︰你唔好亂諗啦！
媽︰…我估，你覺得我係度逼緊你，你好委屈係咪呀？
繼父︰老婆。
媽︰你叫我去波廷南酒窖飲酒，係我逼你既。喺芬德利街嗰啲約會係我逼你既。返咗半日工，有個好煩既八婆突然將可憐既羅伯先生逼入房，因為佢急不及待要執返劑，係咪咁呀，老公？
繼父︰（折好報紙）老婆，話我知，你想點？
媽︰我只係希望我既丈夫可以對我個仔好啲。
繼父︰（打電話）皇家奧伯利係嘛？
（勞、薛一側燈亮）
勞︰皇家奧伯利係嗰個郡啲有錢人既俱樂部。佢已經叫過繼父幾次，要俾我入會。
薛︰佢想你入上流社會。
勞︰更加重要既係，媽媽想兩家人既關係正常化、穩定化，亦暗示我哋要以羅伯家家庭成員既身分，進入佢妻子既圈子…「宣示主權」。
（童勞走過去原本「度假小屋」區域，變為「皇家奧伯利」，LX︰該側燈亮，勞、薛一側LX: F/O）
繼父︰Emily！Emily！
艾蜜莉︰欸，…爸爸。
繼父︰媽咪呢？
艾蜜莉︰媽咪同啲AUNTIES飲緊下午茶，（朝童勞）HELLO！
童勞︰幸會呀！
繼父︰嗯。我同你哋介紹，佢係勞倫斯……Emily，我想你帶勞倫斯熟悉一下呢度，周圍認識一下你啲朋友。
艾蜜莉︰嗯，無問題丫！
繼父︰嘻，太好喇，就咁話架喇喎，唔該晒你Emily，星期日見！（下）
艾蜜莉︰星期日見！
（勞欣賞艾那「渴望已久」的形象；艾不作反應。到朋友堆中）
艾蜜莉︰喂，同你哋介紹丫，佢係勞倫斯。
童勞︰咁多位幸會！（主動上前握手）
眾︰HELLO，幸會。
艾蜜莉︰來丫，上來我間房傾偈丫！
眾︰（應）
（眾人陸續趨向勞身處的猩紅沙發旁邊，此區域即成為「艾蜜莉的臥房」，眾人在這裏聽唱片，聊天，談笑。勞和薛像看電影般看着這段回憶）（LX︰「皇家奧伯利」一側燈F/O；「沙發」一側燈F/I）
勞︰Emily張床係嗰種有四條柱，頂住上面一個木雕頂蓬嗰種古董床。哩部音響喺當時來講極之前衞，我見都未見過。
泛舟男︰哩隻歌係點俾Emily既，希望你鍾意。
勞︰係哩句說話影響到我。
童勞︰（換掉唱片）Emily應該鍾意哩首歌。（坐到泛舟男旁邊，泛舟男有風度地讓開。眾人交換眼神）
艾蜜莉︰多謝晒你哋呀！我媽媽都好鍾意呢隻歌架。
網球女︰嗯，你媽媽都幾有Taste架喎。哈！
艾蜜莉︰喂嗱唔好笑咁大聲呀，被佢聽倒就斃喇，哩啲係佢每日要我聽既「聖樂」來架，要我有修養喎！
泛舟女︰喂，Fiona（網球女），你媽媽好似係保守黨議員來架喎，你喺屋企唔使聽哩啲音樂架咩？
網球女︰唔使，我媽咪淨係叫我俾心機讀書，遲啲入牛津讀法律或者政政就得喇喎。
泛舟男︰如果入去讀理科我媽咪可能幫倒你既。
馬球男︰係喎Justin（泛舟男），你媽媽最近研究緊咩呀？
泛舟男︰唔知呀，佢無乜講呀，就係上次講嗰隻一個月可以剷一次毛既綿羊品種囉，之後我就無Update喇。
馬球女︰你媽咪呢，勞倫斯？佢係做咩架？
童勞︰呃…我媽咪…
艾蜜莉︰佢媽咪算係高級妓女，…係咪呀？
（靜默）
勞、童勞︰唔係！…事實上，佢係低級妓女。
童勞︰哈哈！係呀！
勞︰……當時我係咁答…
薛︰（按摩勞的頭部）…嗯…好喇，今天到此為止。
（LX: B/O）
第4場 猶太會堂
（LX︰燈光非常幽暗。勞仍在上一場結束處，頭部依然疼痛）
（SD︰音樂帶節拍，帶哀怨感。說話帶回音）
勞二︰係哩度…係哩度。（跌跌碰碰找到另一邊。勞取代勞二，在極幽暗的燈光下隱約出現）
勞︰地下室！個劇場喺地下室。
勞二︰楚米齊克！
勞︰楚米齊克！我有你撥打電話的時間，係一個精確既時間（掏出一張紙）—凌晨2點14分，通話時間唔到一分鐘。
勞二︰嗰個係咩電話，你打畀邊個，你打畀邊個？
勞︰楚米齊克！……（鼻子發出嗅到熟識氣味的聲音）
勞二︰（鼻子發出嗅到熟識氣味的聲音）（隱約看到遠處有一張桌子，上面擺放了一些東西。迅速走上去抓起一張「海報」，轉身之際，有人忽然起身，用棍打擊勞二的頭部）呀！！
（SD︰急速節奏聲、呼吸聲、電話接通接不通的聲音漸大至最大C/O）
（LX︰射燈照勞）（勞血流披面，手持海報，微笑卻感到疼痛）
勞︰《老單身漢布倫菲德》，伯戈米‧楚米齊克改編，薛若德飾演布倫菲德。哼！（撥打電話）
薛V.O.︰你好，我係Melody//，依家暫時就唔得閒接你電話，有事既請講低丫，我一定會覆你既。
勞︰//Melody……/嗯，我係勞倫斯，請覆番電話畀我，64179283。…（勞決定撥打另一電話號碼，沒人接，躊躇間，LX︰B/O）（SD︰急速節奏音樂、呼吸聲、電話沒人接的聲音，延續至下一場）
第5場 研究室
（電話響，勞倫斯接電話）
勞︰喂？係…（我哋查倒個地址喇）真係既？（確實無誤！不過要再加兩百蚊）咩話！之前已經加貴成四倍架喇喎，使唔使呀問個地址啫！（勞倫斯先生，四倍價錢是對查詢沒有登記的電話號碼的附加費，現在的二百蚊係風險附加費）風險附加費？你當我傻仔呀，禁住來搶！（咁講丫，勞倫斯先生，哩筆錢係為咗彌補我哋被人釘牌既風險，同時亦都確保你享有某種程度既保密）你有咩風險呀？都唔知你講乜！（嗰度係一個庇護所，米勒先生）庇護所？（專收容家庭暴力的受害者）嗯，嗯，得喇得喇！我俾我俾！
勞二︰（竊笑）
勞︰（碰見勞二，驚訝、疑惑、茫然、不知所措）
勞二︰布魯諾、性騷擾、《老單身漢布倫菲德》、改編者楚米齊克、佢係劇既改編者、都係教授、喺猶太會堂地下室被人打、你既106研究室、庇護所……幾有創意丫！
勞︰你…你講咩呀？
勞二︰你既推理好—有—邏輯！
勞︰（執起電話聽筒）楚米齊克！
勞二︰楚米齊克。
勞︰楚米—齊克……（撥電話）
勞二︰（竊笑。下）（用DS 出口出，用US入口入，坐在安樂椅上戴上大鬍子S/B）
第6場 柯林斯
（燈亮。演員在台中央更換芭芭拉的衣服（連身長裙？），加上高領毛衣，再配上另買的女裝鞋。過程迅速，面部表情卻冷靜得令人出奇。更衣過程以觀眾席為鏡子，更衣後，試了幾個女性姿勢，認為滿意。燈光由慘白轉為原色）
勞︰好得，我係最匹配既！……我真係好興奮，你話邊個比我更加適合做哩件事呢。真係興奮！……又好輕鬆，係，輕鬆至啱。
楚（由飾演勞二的演員「戴上大鬍子」飾演。觀眾此刻開始認出）︰睇下你幾緊張。
勞︰我無。
楚︰面色慘白、手心冒汗。
勞︰我無呀！痴線架！我點會緊張呀（喉頭異常乾涸），我專業架嘛。
楚︰專業咩呀？扮女人呀？
勞︰我既專業係，社會心理學、性別研究，我係性騷擾防//
楚︰咁又係呀，你咁憎女人。
勞︰邊有呀？
楚︰無？
勞︰無。同你講都嘥氣//
楚︰你最憎你阿媽，其次就係你老婆。
勞︰你都發神經！我憎佢哋？我都不知幾愛佢地！
楚︰你憎佢地，以致憎晒所有女人。
勞︰我最愛既人就係我老婆同我阿媽！無人比我更愛佢地！
楚︰你甚至……
勞︰我唔愛佢地無人愛佢地！
楚︰你睇你幾緊張。
勞︰我無！我無呀！
楚︰你睇吓你……
勞︰又係你…又係你！（裙下尿濕台面，自己發現後又狼狽又悲傷。找來一條毛巾，迅速抹擦台面，再抽起裙子擦乾雙腿，從手袋裏抽出一條羊毛袜褲穿上）楚米齊克！我今晚唔搵你出來我唔係人！
（LX︰燈光忽然轉回慘白）
勞︰男扮女裝去一趟咁樣既旅程，我視為一次學習，嗯，更加係一次賦權，EMPOWERING既經驗，以後我可能叫我既學生都試一次，作為學期中間既一次功課。我記得以前讀過，西伯利亞的薩滿巫醫有時都會變身為女人，進入精神領域之旅……或者我返來之後會好似佢地一樣，可以見到異象，具備治療或者預言能力。
（LX︰燈光忽然轉回原色）
勞︰（在台上走動，像在尋找甚麼。到處躲避別人的目光，也怕被人認出。跌跌撞撞，從手袋拿出一根蠟燭，忙用火柴點燃，走兩步吹熄了，又再點燃，小心用手護着火光，腳步越走越快……直至瑟縮在地，悲慟不已）
（一群穿着同色T恤的女人發現有人在門口那邊）
喬瑟芬︰瑪琳？係咪瑪琳呀？收到你既電話我哋不知幾高興……我哋等緊你。
勞︰……
喬︰使唔使幫你敷吓呀，瑪琳？
勞︰（搖頭）
喬︰唔使？唔麻煩架喎，整個冰袋之嘛。
女人甲翠西︰我去丫，喬瑟芬！
喬︰我哋哩度，個個都咁好人既。（拿出一些表格）你填咗張表先……我哋有各式各樣既咨詢同埋法律服務，只要你想既話，我哋馬上為你預備。嗯，不過我估你依家八成係想瞓番覺好既，係咪？
勞︰（點頭）
凱西修女︰欸瑪琳，我哋啱啱有個聚會，不如你都一齊參加丫！
喬︰都好喎！/
女人甲︰（取冰袋給勞）係羅！聚會完咗，我帶你去睇你間房丫！嗱你自己敷住佢丫。
凱西修女︰不如我哋開始囉。
眾︰好呀！
喬︰（分發蠟燭）
凱西修女︰（燃點一根蠟燭，然後各人傳點燭光）
女人乙︰今日，我開始先啦……我根本無諗過會同佢一齊…我哋講好咗事情搞掂就各不拖欠。
勞︰搞掂咩呀？
凱西修女︰唔好意思，我哋聚會唔問問題住，大家想講咩就講咩，唔需要顧忌。我哋呢只要肯聽，對我哋既姊妹就係最好既支持。
勞︰哦OK，唔好意思！
女人乙︰唔緊要…係佢搞到我詞不達意既！你哋聽過「綠卡婚姻」未？即係啲人想得到美國的居留權，就同我哋假結婚…當然我有收錢啦。咪就係咁，本來就唔應該有咩瓜葛……後來神推鬼（擁）之下，我有咗佢BB…仲要生埋出來，佢話鍾意丫嘛。咁鍾意要養架嘛！唔係鍾意就大晒架嘛！……佢以為我鑿佢錢，佢都痴線架！鑿錢都唔鑿佢啦，貪佢秃頭！貪佢有臭狐！哩啲咁既錢一啲都唔好賺，我唔玩喇……嘿，要綠卡嗰個又唔係我，咪同佢講離婚囉，點知佢就開始打我。
凱西修女︰妹豬！
女人乙︰噢！妹豬我…。又唔係乜嘢，叫佢買嘢俾阿仔之嘛，使唔使妹豬成咁呀！
勞︰跟住呢？
凱西修女︰瑪琳！
勞︰I’M SORRY。
女人乙︰我反鎖喺房，估都估唔到，佢竟然要破門。
女人甲︰嘩！係咪《閃靈》呀？// I’LL BE BACK！
女人乙︰//嘿！係呀，I’LL BE BACK！咁我就開咗扇窗，同阿仔（示意跳出去）
勞︰（自言自語）仲唔係楚米齊克！
（ FLASHBACK 和妻子的晚飯︰勞二、卡蘿、梅洛蒂‧薛若德（卡蘿的演員女性朋友）在舞台的另一端一起晚飯）
勞二︰嗨！咁遲既？
妻︰嗯，齣劇完我哋就即刻返來喇。我先生勞倫斯、演布倫菲德既梅洛蒂‧薛若德。
勞二︰薛若德小姐，你隨便！當自己屋企丫。（幫二人斟酒）
梅︰嘻！你叫我Melody得架喇，打攪晒呀，勞倫斯先生。
勞二︰唔好咁講啦，自己人丫嘛，來！試少少紐西蘭威靈頓既Sauvignon Blanc丫！
（妻偷偷服食一顆鎮靜劑）
梅︰嘻！看來勞倫斯先生都係識飲之人！
勞二︰嘿邊度係呢，係平時有飲兩杯咁。
梅︰呀，你哋有無去過普利茅斯之岩，嗰度好多靚酒，嘩！飲到你唔飲！
勞二︰普利茅斯之岩？
梅︰夜總會，嗰度有好多，性愛遊戲。
勞︰楚米齊克！
眾人︰（轉望勞一下）
女人乙︰好七！？係呀，好嗱七架！
眾人︰……
女人甲︰到我講到我講！
凱西修女︰請隨便。
女人甲︰（望望各人）啱啱寫咗首詩形容個衰佬//
凱西修女︰隻貓。
女人甲︰隻貓！
凱西修女︰我哋都叫佢哋做貓。
女人甲︰係既，貓！我讀俾你哋聽丫。有無睇過《泰吾士日報》呢咪通常有段打油詩既，咩「阿妹今日要休息，辛苦搵來志在食」之類既？
勞︰有睇呀，你竟然識背？
凱西修女︰乜你哋都睇架咩？
其他人︰無架。
女人甲︰我寫架嘛！欸，聽住，今次唔係「阿妹」開頭既。「死佬//…
眾人︰貓！
女人甲︰OOPS！OK！ 死貓今日好得戚 背住老婆去偷食
三日唔埋話休息 叫佢煮飯又詐唔識
攤大手板話無錢 你話隻死貓賤唔賤
食完飯就人都唔見 你方唔係去打野戰
返來背脊幾條綫 佢實話去咗做GYM
千祈咪被佢欺騙 實情係有咗第二件
兩頭住家都唔夠 仲有酒吧嗰個竇
問親佢就當我尋仇 話唔係搶又唔係偷
你話咁樣嬲唔嬲 我日日就朝九晚九
佢就晚晚搵女溝 睇佢個死樣咁招積
用晒份老本去偷食 鬼唔望佢條嘢生漬
水泡生到五顏六色 ……
有次我再次抱怨……
結果鼻哥被佢打斷…… YEAH~~……
嬲既時候咁樣玩吓都OK丫……你哋唔覺咩？
凱西修女︰將憤怒變成笑聲？
（ FLASHBACK 和妻子的晚飯︰勞二、卡蘿、梅洛蒂‧薛若德（卡蘿的演員女性朋友）在舞台的另一端一起晚飯）
勞二︰都係下次先喇，我都好想試吓，嗰種遊戲架，不過聽日要早起去working visa 個interview，約好咗喇。老婆可？
妻︰我去丫。今晚夜少少返。
勞二︰哈哈，老婆飲多咗呀！佢有時都係咁架，亂咁講嘢//
妻︰//我會去。
勞二︰你未試過咁樣望住我。
妻︰仆街，你唔好管住晒好唔好？
（勞二推翻桌上物件，離開燈區，此燈區隨即LX: F/O。勞二拿起鋼棍走過去舞台另一端，戴上大鬍子，進入「婦女」燈區，狠狠扯女人甲衣領拖在地上，向女人甲抽打下去，勞一手架擋過去）
勞︰點可以咁對自己老婆！（扭打成一團）
凱西修女︰瑪琳！
眾︰瑪琳！（試圖分開）瑪琳！
妻（卡蘿。中性面孔，當着觀眾穿起和婦女同色T恤。然後在人群後出現）︰勞倫斯！
勞、勞二︰卡蘿！卡蘿！
妻︰趕佢出去！
警衞︰（至，站在勞和妻中間，喝止）請你離開哩度！
勞、勞二︰卡蘿！
妻︰走呀！離開我呀！我有人身保護令！我有人身…保護…令呀！
勞、勞二︰痴線！咩人身保護令，我係你老公呀，放開我！卡蘿！
妻︰你走呀！唔好行埋來！唔好行埋來！
勞︰你做乜嘢呀，你唔認得我？我係你老公呀…我專登來搵你架…
妻︰唔好埋來！
勞︰放開我呀！我係老公呀，返屋企丫好無呀？……
（警衞上前捕捉；勞身上再跌出一枝鋼棍；勞驚訝、勞二先掙脫，發足狂奔；勞使勁掙脫）
第八場 研究室
（勞回到研究室，悲慟不已，瑟縮於桌子下，蓋上被子蜷縮着）
**（勞二從被子堆中走出來，木無表情，頭頂明顯長出一角，整理衣冠，離開台面。LX: B/O）
全劇終
